Laudioko Udalak San Roke egoitza zaharraren birgaitzea atzeratu eta Europako Next Generation funtsetatik jasotako 1,1 milioi euroko dirulaguntza itzuli du, "dagoeneko martxan dauden gainerako proiektuen bideragarritasuna" ez baldintzatzeko. EAJk erabaki hori errefusatu du prentsara igorritako ohar baten bidez, eta nabarmendu du ez direla obra finantzatzeko koinbertsio-formulak aztertu.
Jeltzaleek nabarmendu dute eurak gobernuan zeudenean lortu zela 1,2 milioi euroko finantzaketa NEXT Generation funts europarretatik. Opozisioko taldearen arabera, proiektuak eraikinaren birgaitze integrala jasotzen zuen, haren jasangarritasun energetikoan fokua jarriz, eta ekintzailetzara bideratutako espazio ireki eta balioaniztunak sortuz coworking-guneak, enpresa-hazitegien guneak eta industria-ekimenak erakarriz.
Ander Añibarroren ustetan, “EH-Bilduko udal gobernuak ez du inoiz proiektu honen aldeko apusturik egin”. Gauzak hala, egitasmo horrek “lanpostu berriak sortzeko eta Laudio biziberritzeko” zuen ahalmenari uko egitea leporatu dio bozeramaile jeltzaleak Ainize Gastaka alkatearen administrazioari.
EAJtik adierazi dute erabaki honek dakarrela udalerriko proiektu estrategikoetako bat deuseztatzea eta erantzunik gabe uztea "joan den legegintzaldian bideratzea lortu zen behar historiko bat”. Gainera, eragin ekonomikoaz gain, jeltzaleek uste dute aukera galdu dela “Laudioko bizitza soziala eta ekonomikoa dinamizatzeko balioko zukeen auzo- eta ekintzailetza-gune bat sortzeko".
Horregatik guztiagatik, alkateari eskatu diote “lan egin dezala udalerriarentzat hain garrantzitsua den proiektu bat finantzatzeko formulak bilatzeko”.