Irailaren 30ean dekretu bidez onartu zuen Laudioko udalbatzak zinegotzien eta alkatearen ardura banaketa berria. Izan ere, Omniak udal gobernu taldea uztea erabaki zuen ekainean eta talde independentearen ardurak EH Bilduko ordezkarien artean banatu behar izan dituzte.
Gauzak horrela, Ainize Gastaka alkateak ingurumena eta trantsizio energetikoa, irisgarritasuna eta mugikortasuna hartu ditu bere gain. Aurretik bazituen Udaltzaingoa, idazkaritza, plangintza estrategikoa eta hirigintza, alkatetzarekin batera.
Nagore Gomararen ardurak baziren hizkuntza-politikak, gobernantza feminista, burokraziaren aurkako HAZ-Bulegoa, aniztasuna, parte-hartzea eta auzoak, eta horiei gehitu dizkie obrak, zerbitzuak eta mantenua.
Iñigo Martinezen eskumenak ziren ogasuna, kontu-hartzailetza eta diruzaintza eta langileak eta orain Laudio Hazi agentzia ere egongo da bere betebeharren artean.
Azkenik, Sonia Respaldizak kultura hartuko du bere gain eta liberatuta egongo da, sail horren eta jaien eta identitatearen arloen buru izateko.