Omnia alderdiak oharra plazaratu du ordenantza fiskalekin egindako lana aldarrikatzeko. Izan ere, ez-ohiko udalbatza egin zuten ostiralean horretarako eta EH Bildu, PSE-EE eta Omniaren bozekin egin zuten aurrera.
Independenteek adierazi dute ez dela erraza izan akordioa erdiestea eta hainbat astetan landu dutela negoziazioa EH Bildurekin. Hala ere, Omnia harro agertu da emaitzekin. Eskaini duten lehen adibidea izan da etxebizitza hutsei ezarritako Ondare Higiezinen Zergako %50eko errekarga. Izan ere, Omniaren aburuz, "helburua da edukitzaile handiek beren etxebizitza hutsak alokairuan jartzea eta, horrela, eskaintza handitzea, eta ez bigarren etxebizitza bat duten bizilagunek haren karga handitzea. Horren adibide dira erretiratutako pertsonak, denboraren zati bat beste udalerri batzuetan ematen dutenak (kasu askotan dagoeneko herri horietan erroldatu dira), baina aldi baterako Laudiora etortzen direnak senideak ikustera edo denboraldi jakin batzuk igarotzera. (...) Omniak zerga hori kentzeko irizpide bat planteatzen du jabetzako lehen etxebizitzarako, eta, beraz, antzeman ditugun arazo gehienak arinduta geratuko lirateke".
Zerga horretan ere bestelako zuzenketak plazaratu dituzte. Adibidez, jarduera ekonomiko bat jasotzen duen etxebizitzetan errekarga ez aplikatzea.
Horrez gain, alegazio aldian zuzenduko dute OHZren tasaren hobaria lehen hiru urteetan, babes ofizialeko etxebizitzen kasuan. Familia ugarientzako hobarian, amaitu gabeko esaldi bat dago, kategoria bereziko familia horiei % 75eko hobaria ematen diena.
Halaber, karga horri dagokionez, saltokientzako balioak aldatzea eskatu dute, 240.000 eurotik 310.000 eurora pasatzeko katastro-balioa, saltoki txikiek kalterik jasan ez dezaten.
Hurrengo urterako helburua
Bide batez, tasen igoeren gaineko adostasuna azalduta, Omniak berretsi du bere asmoa dela %90eko hobaria lortzea etxegabetze-prozesuan dauden etxebizitzentzat. "Jendeak alokatzea nahi badugu eta Laudiotik ezin badugu alokairuen legea aldatu, gutxienez keinu bat izan behar dugu alokatu baina prozesu judizial batean sartuta daudenekin. Gobernu-taldeak puntu hori sartu du, baina etxebizitza hutsen kargaren salbuespen gisa. Datorren urtean ere gauza bera egingo dugu", aurreratu du alderdi independenteak.