Osasun sistema publikoaren Aiaraldeko egoeran jarri du begirada Facua Euskadik. Kontsumitzaileen gobernuz kanpoko erakundeak bat egin du Zainketa Intentsiboetarako Unitate (ZIU) mugikorrean langile gehiago jartzearen aldarriarekin, "bizilagunei asistentzia mediku azkar eta eraginkorra eskaini ahal izateko larrialdi kasuetan".
Facuako kideek gogora ekarri dute abuztuan Laudioko bizilagun bat hil zela ZIU mugikorrean medikurik ez zegoen une batean. "Elkarteak jakin du udalerri horretan benetako arazo bat dagoela medikurik ez dagoelako, eta egoera horrek arriskuan jartzen duela larrialdietan bizilagunei arreta medikua emateko dagoen azkartasuna".
Horri lotuta, erakundeak nabarmendu du legeak zehazten duela osasun baliabideak "eraginkortasuna, bizkortasuna, ekonomia eta malgutasuna" kontuan hartuz moldatu behar direla, eta EAEko osasun administrazioari dagokiola osasun publikoa bermatzearen ardura. Gauzak hala, elkarteak Osakidetzari eskatu dio beharrezko jarduera guztiak abian jar ditzala "zerbitzu eraginkorra" bermatzeko Laudioko larrialdietan, "arreta berezia jarriz udalerrian dagoen ZIU mugikorrean langile gehiago jartzen".