Uztailean itxi zen Laudioko Ezka kalea trafikora, espazioa oinezkoentzako gune bilakatzeko. Baina erabakiak hainbat gorabehera sortu ditu zonaldean bizi direnen artean. Zenbait bizilagunek sinadura bilketa abiatu dute eta atzo mozioa aurkeztu zuten Udal Osoko Bilkuran. Bertan azaldu zutenez, ez daude espazioa oinezkoen gune bihurtzearen aurka, baina ibilgailuentzako sarbidea atontzea eskatu zioten Udalari, bizilagunek premiazko kasuetan erabili ahal izateko.
Azaldu zutenez, Ezka kalean zein Alberto Aceron “jende nahiko nagusia” bizi da, jende asko “1975. urtean sartu zelako bertan bizitzera”. Hori dela eta, arazoekin topatu dira anbulantziak kalera sartu behar izan direnean. Era berean, erosketa handiak etxera eramateko trabak ere salatu zituzten atzoko plenoan. “Guk ez dugu soluziorik. Eskatzen duguna da larrialdietarako sarbidea atontzea bizilagunek baliatu ahal izateko”, azaldu zuten. Beste bizilagun batek, aldiz, nabarmendu zuen antzeko egoerak bizitzea egokitu zaiola Batzalarrin kalea itxita egon denean.
Aho batez onartuta
Aho batez onartu zen auzokideen mozioa, talde politiko guztien aldeko botoekin. Udalak aurreratu zuen “hausnarketa bat” egingo duela egoera nola bideratu aztertzeko. Izan ere, tokiko erakundearen aburuz, ez da gai erraza. “Oinezko kale ugari ditugu herrian eta bakoitzak errealitate ezberdin bat du. Proposatu beharko dugu metodo bat kale guztietan aplikagarria izango dena eta bizilagunen beharrei erantzungo diena”, adierazi zuen Ainize Gastaka alkateak.
