Greba mugagabea abiatuko dute Guardianeko langileek otsailaren 2tik aurrera. Modu horretan, multinazionalak lantegiko labea behin betiko itzaltzeko asmoen aurka egin nahi dute beharginek.
Izan ere, atzo bertan zabaldu zen Guardianek Laudioko lantegiari jarritako heriotza data. Zuzendaritzak otsailaren 3an ekin nahi dio fabrikako labea itzaltzeari, ordezkari sindikalei aurkeztu zien dokumentazioaren arabera.
Multinazionalak labearen barruan dagoen beira eta eztainua erretiratu gabe amatatu nahi du makineria, azpiegitura erabat erabilgaitz utziz, eta "bestelako alternatibarik baloratu gabe".
Labea itzaltzearen aurka, grebara
Hain zuzen ere, labea itzaltzea da enpresa batzordeak ekidin nahi duena. Hainbat asteko prozesua behar da makineria itzaltzeko, eta beharginen esku-lana ezinbestekoa da prozesua aurrera eramateko.
Behin hori eginda, ez dago atzera bueltarik. Greba mugagabeak prozesua gauzatzea ekidingo luke. "Ez dugu itxieraren parte izan nahi", adierazi diote iturri sindikalek Aiaraldea Komunikabideari.
Mobilizazio dinamika
Urtarrilaren 27an, astelehena, langile batzarrean aurkeztuko du Guardianeko enpresa batzordeak datozen asteetarako prestaturiko mobilizazio dinamika.
Gaur elkartu dira Guardianen ordezkaritza duten ELA eta LAB sindikatuak, eta bideorri bateratua zehaztu dute. Greba mugagabeaz gain, bestelako ekimenak ere gauzatuko dituzte langileek, enpresaren itxieraren aurrean alternatibak bilatzeko.
Alde batetik, Eusko Jaurlaritzarekin, Laudioko Udalarekin edota Arabako Foru Aldundiarekin batzartuko dira ordezkari sindikalak datorren astean, lantegiaren itxieraren aurrean alternatibak bilatzeko mekanismoak martxan jar daitezen.
Bestetik, manifestazio handia deituko dute ere datorren aste amaieran, herritarrak mobilizatu eta multinazionalaren erabakiaren aurka protestatzeko.