Guardianen itxiera

Guardianen interesa duten inbertitzaileekin hitz egiten jarraitzen dutela ziurtatu du Ramiro Gonzalez Ahaldun Nagusiak, baina "akordio sozial handi" bat behar dela nabarmenduta

Txabi Alvarado Bañares 2025ko ots. 3a, 16:40

Ostiralean milaka lagunek parte hartu zuten Laudion eginiko mobilizazioan. Irudia, Guardianeko Enpresa Batzordeko kideak. / Aiaraldea.eus

Diputatu Nagusiak defendatu du Aiaraldeak baduela etorkizuna, baina horretarako "akordio sozial handi bat" beharko dela, aukera emango duena "inbertitzaile erakargarriak berreskuratzeko".

Arabako Batzar Nagusietara iritsi da Guardianen itxieraren auzia. Ramiro Gonzalez Ahaldun Nagusiak hitza hartu du bertan gaur goizean, eta ziurtatu du "etengabe" ari direla lanean, "Eusko Jaurlaritzara eta Arabako Foru Aldundira hurbildu diren inbertitzaileekin hitz egiten, eta enpresarekin berarekin bide bat adosten, proiektuari etorkizun bat emateko". 

Baina, horretarako, "akordio sozial handi bat" behar dela nabarmendu du Ramirezek, eta aipatu egin ditu Arabako Ekonomialarien Elkargoaren hitzak, esanez "gatazka handiak dituen eskualdearen irudia txarra dela talentua eta atzerriko inbertsioak erakartzeko". 

Ahaldun Nagusiak aipatu du mota horretako pertzepzioak "aspalditik" ari direla iristen Foru Aldundira. "Eskualdeko eta kanpoko eragile ekonomikoekin harreman asko izan dira, eta horietan sortu dira gogoeta horiek, batez ere Tubacexen gertatutakoaren ondoren", nabarmendu du agintariak, eta horregatik defendatu du eskualdean "lankidetzaren kultura" indartu behar dela. 

Ahaldun Nagusiak Arabako Ekonomialarien Elkargoaren hitzak aipatu ditu, zeinek defendatzen duen "gatazka handiak dituen eskualdearen irudia txarra" dela "talentua eta atzerriko inbertsioak erakartzeko". Ramiro Gonzalezen hitzetan, horrelako gogoetak  aspalditik ari dira iristen Foru Aldundira, "Tubacexen gertatutakoaren ondoren" batez ere.

Horri lotuta, duela 4 urte Eusko Lehenbiltzarrean Aiaraldeari buruz egin zen ponentzia ekarri du gogora Ahaldun Nagusiak, nabarmenduz bertan ondorioztatu zela beharrezkoa dela "komunikabideetan isla atseginagoa izatea eta sindikatu-, lan- eta gizarte-harremanak hobetzea, absentismoa eta enpresa handien deslokalizazio-mehatxua murrizteko". Bere hitzetan, ondorio horiek adostasun politiko zabala izan zuten, eta beharrezkoa da horri ekitea, "kontzentsu soziala" ere lortuta. 

Elkarrekin Podemosen erantzuna

Elkarrekin Podemosek, bere aldetik, ikuspegi kritikoagoa zabaldu du Batzar Nagusietan Gonzalezek emandako azalpenak entzun ostean. David Rodriguez bozeramailearen hitzetan, Guardianek 2020tik darama Laudioko fabrika ixteko asmoekin, eta hori aurreikusi ez izana leporatu die erakunde publikoei orokorrean,  eta Ramiro Gonzalezi zehazki. 

“Gai larri baten aurrean gaude. Hau ez da urtarrilaren 21ean hasten, Guardianek itxiera iragarri zuenean; 2020an hasi zen, haizetakoen dibisioa salduta. Ordutik gaur arte sortu den proiektua da. Arabako Batzar Nagusietan abisatu genuen, eta orain denborak arrazoia eman digu”, nabarmendu du alderdi moreko ordezkariak.

Horren aurrean, Rodriguezek "babes osoa" helarazi die Guardianeko langileei eta "enpresaren itxierak zuzenean edo zeharka kaltetutako pertsona guztiei". Horri lotuta, Elkarrekin Podemosek kideek aipatu dute ostiralean Laudion eginiko mobilizazioan parte hartu zutela, eta egingo diren hurrengo ekimen guztietan ere egongo direla. 

LAGUN AGURGARRIA:

Bisitatzen ari zaren webgune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide