EH Bilduk eta Omniak pasa den astean jakinarazi zuten akordioa lortu dutela Laudioko udal aurrekontuek aurrera egin dezaten, hiru hilabeteko negoziazioaren ondoren.
Edonola ere, koalizio independentistak iragarri du bere asmoa dela ahalik eta adostasun zabalena lortzea gainerako alderdiekin zein herriko eragileekin, eta euren proposamenak islatzea aurrekontuetan.
“Beste alderdien proposamenek aurrekontuak hobetzen dituztela sinistuta gaude. Izan ere, Laudioko benetako beharrei guztion artean erantzun beharra daukagu, laudioar guztion bizi-kalitatea era kolaboratiboan hobetu dezagun”, adierazi du Ainize Gastaka alkateak.
Orain arteko akordioaren gakoak
EH Bilduk azpimarratu du hauek izan direla Omniarekin sinatuta akordioaren oinarri nagusiak: aurrekontuen izaera kolaboratiboan sakontzea, auzo batzar eta herritarren parte-hartzea sustatzen duten gainerako egiturak indartzea eta egun martxan diren Antzokia, Lamuza sormen gunea edota Abastos plaza udal proiektu estrategikoen garapenerako bermeak ziurtatzea.
"Aldi berean, Omniarekin batera amiantoaren desagerpenean lanean jarraituko dugu, hala nola, Herriko plazaren zoladura hobetzen edota Karmen kalea txukuntzen errekako ibaiaren obra ostean. Gainera, etxebizitza komunitarioen filosofian sakondu nahi da, baita proiektu berriak abiatu ere: Santa Cruz Zubia edota Jesus Guridi", aipatu du udal gobernu taldeak.