Guardian konpainiako zuzendaritzak adierazi du ez duela alboratzen Laudioko azpiegiturak saltzea "inbertsore sendo bati", baina "ez diola inolako lan ardurarik utziko". Hau da, balizko salmenta hori soilik gertatuko dela astelehenean abiatutako lan espedientea burutu eta gero, 171 langileak behin kaleratuta, alegia.
Enpresak berak erantsi du martxoaren 3an aurkeztu zuela kaleratzeak egikaritzeko dokumentazioa eta 30 eguneko kontsulta tartea egongo dela. Halaber, aipatu du hitzarmen kolektiboa errespetatuko duela eta negoziatuko duela. Horrez gain, positibotzat jo du Eusko Jaurlaritzaren jarrera, balizko inbertsoreekin harremanetan jartzeagatik.
Astelehenean elkarretaratzea egin zuten kaleratzear dauden langileek Laudioko lantegiaren aurrean. Gaur Arabako Batzar Nagusietara jo dute eta datorren astelehenean berriro egingo dute protesta fabrikaren atarian. Horrez gain, martxoaren 15ean "Eskualdeko ekimena" deitu dute Guardian enpresaren itxieraren eta eskualdeko enplegu suntsiketaren kontra, Gasteizen.