15 pertsona daude gutxienez Laudion kalean bizitzen. Hori ondorioztatu zuten iazko urrian eginiko zenbaketan. Igoera esanguratsua izan zen, bi urte lehenago eginiko kontaketan ez baitzen inor topatu herriko karriketan lo egiten.
Egoera berri horrek bultzaturik, bizilagun talde bat biltzen hasi zen urte hasieran, “egoera horri erantzun posibleak” bilatzen hasteko asmoz. Hainbat bilera egin dituzte ordutik hona, eta gaur (martxoak 18) egingo dute lehen ekitaldi publikoa, 18:30ean Laudioko Kultur Etxeko Arraño aretoan.
“Esperientzien mahai-ingurua” antolatu dute, Euskal Herriko hainbat eragileetako kideak gonbidatuta, euren herri eta auzoetan zer nolako ekimenak egin dituzten ikusi, horietatik ikasi eta pentsatzen hasteko herrian zer eta nola egin daitekeen.
Lau pertsonek hartuko dute hitza orotara: Ridouane Chakouch Laman (Agharaseko kidea, Bizkaiko Imazighen Elkartea), Carlos Saez de Lafuente Zabala (Getxoko Ongi Etorri Errefuxiatuak), Luisa Menendez (Bilboko Alde Zaharreko Ongi etorri errefuxiatuak) eta Atxuri Harrera Elkarteko ordezkari bat.
Antolatzaileek bizilagun guztiei luzatu diete bertaratzeko gonbita, eta baita eskualdeko gainontzeko herritarrei ere. Izan ere, kalean bizi diren pertsonen zenbaketa Laudion soilik egin zen iaz (Amurriok eta Urduñak 2020 eta 2018an utzi zioten zenbaketak egiteari, hurrenez hurren), baina ekimenaren sustatzaileak ziur daude Aiaraldeko beste udalerrietan ere dagoela antzeko egoeretan bizitzen ari direnak.