Atzo 11:00etan batzarra egin zuten berriro Guardian multinazionaleko arduradunek eta Laudioko lantegiko beharginen ordezkariek. Herriko lantegia ixtea eta bertako 171 langileak kaleratzea helburu duen enplegu erregulazioko espedientea izan zen bileraren ardatza eta bi aldeen arteko desadostasuna azaleratu zen berriro.
Atzo, gainera, hirugarren eragile batek ere parte hartu zuen eztabaidan. Hain zuzen, Guardianek kanpo enpresa bateko kideak eraman zituen. Konpainia horrek osatu ditu txostenak Laudioko lantegiaren itxiera argudiatzeko eta beharginek eurekin ere eztabaidatu behar izan zuten.
Sindikatuen ordezkariek leporatu zioten enpresa horri Guardianen datuak soilik baliatu izana, beste inorekin alderatu gabe. Zentzu horretan, langile erakundeek berriro adierazi zuten ez dagoela ekoizpen arrazoirik fabrika ixteko, eta arrazoi bakarra dela multinazionalak nahiago duela han ez inbertitu beste tokiren batean egiteko.
Eztabaida giro tenkatuan gertatu zen eta Guardianek ez zuen ezer aipatu eskaintza ekonomikoei buruz.
Asteartean bilera berria, informazio gehiagorekin
Datorren asteko asteartean izango da hurrengo batzarra enpresaren eta langileen artean, 9:30ean. Beharginek jarrera osatuagoa eramateko aukera izango dute.
Izan ere, pasa den astean exijitu zioten enpresari informazio gehiago bidaltzea. Dokumentu horietako asko oso berandu heldu ziren eta ez zuten izan atzoko bilerarako lantzeko tarterik.