Barquin y Otxoako kamioilari bat hil da trafiko istripu batean, eta hori salatzeko elkarretaratzea egingo dute ostiralean

Txabi Alvarado Bañares 2025ko mar. 19a, 18:10

2023 amaieran finkatu zen Barquin y Otxoa Laudion. / Aiaraldea.eus

Madrilen hil zen 62 urteko garraiolaria iragan astean, auto batek harrapatuta. 

Laudion finkatutako Barquin y Otxoa enpresako kamioilari bat zendu zen iragan astean Madrilen. Auto batek harrapatu zuen kamioia hartzera zioanean. Hori salatzeko elkarretaratzea egingo dute datorren ostiralean (martxoak 21) Laudioko lantegiaren sarreran, 13:45etatik 14:15etara. Izan ere, behargina eskualdekoa ez zen arren, enpresa horrentzat egiten zuen lan. 

LAB sindikatuak salatu du gertatutakoa lan istripu bat izan dela, mota horretako gertakariak "trafiko istripu gisa" ezkutatzen diren arren sarritan estatistika ofizialetan. 

Hildako beharginaren adina ere jarri dute mahai gainean, 62 urte zituela nabarmenduta. "Erretiratzeko adina 60 urterekin izatea langile guztientzat eskatzen da, baina eragin berezia du sektore honetan", azaldu du sindikatuak, eta aldarrikatu du administrazioek erraztasunak jarri beharko lituzketela erretiro adina aurreratzeko, "lan baldintza neketsu edo arriskutsuak" dituzten pertsonen kasuan batez ere.

Izan ere, gaineratu dutenez, beste ogibide batzuekin hori egiten da, "itsas langile, burdibide edo meategietakoetan" kasu. 

Horrez gain, langile erakundeak salatu du garraioaren sektorean jarduten duten behargin guztiak daudela  "bizkarreko minak jota eta nekea zein gaixotasun muskulo-esletikoak eta psikosozialak pairatzen", baina gaitz horiek ez direla inoiz aitortzen "gaixotasun profesional bezala". 

Urtebete eskualdean

2023 amaieran finkatu zen Barquin y Otxoa Laudion, ordura arte LIDLek okupatutako pabilioia hartuta. Hogei urte baino gehiagoko ibilbidea du konpainiak eta Ortuellan, Gasteizen eta Kantabrian ere ditu azpiegiturak. 

LAGUN AGURGARRIA:

Bisitatzen ari zaren webgune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide