Mikel Jauregi Industria Sailburuak atzo adierazi zuen Eusko Jaurlaritza prest dagoela Guardian enpresaren erosketan parte hartzeko zenbait baldintza betez gero, eta gaur bertan erantzun dio LAB sindikatuak.
Izan ere, langile erakundearen ustez, kaleratzeko arriskuak dauden 171 beharginen lanpostuak mantentzea ez da izan lehentasuna Eusko Jaurlaritzarentzat: "Ez dago arrazoi tekniko edo produktiborik, eta are gutxiago ekonomikoak, saihestezina denik; aitzitik, kalkulatutako estrategia bat da, lantegia ixtera eta 171 lanpostuak suntsitzera daramana. Zoritxarrez, Eusko Jaurlaritzak entzungor egitea erabaki zuen, eta Guardian enpresari labea hozteko prozesua aurrera eramatea ahalbidetu zaio, benetako negoziazio-biderik ireki gabe, langileekin kontatu gabe eta inbertitzaileak edo jarduera industrialari jarraipena emango lioketen proiektuak bilatzeko aukerarik aztertu gabe, lan-kontratuak suntsitzeko EEE-a iritsi aurretik".
Alegia, LABen ustez, kaleratzeak ez dira ahalbidetu behar: "Multinazionalak ezarritako ibilbide-orria besterik gabe onartu beharrean, erakundeek benetako negoziazio-esparru batean lan egin beharko lukete, non langileek ere ahotsa izango duten eta egungo arazoari erantzuteko benetako konponbideak bilatuko diren".
Hori dela eta, sindikatuak hausnarketarako deia zabaldu du: "Eusko Jaurlaritzak eta instituzioek horrelako egoeretan benetan esku hartzeko duten gaitasunari buruzko hausnarketa egitea eskatzen dugu. Ezin dira multinazionalen erabakien aurrean ikusle hutsak izan. Interes guztiak ordezkatuta egongo diren negoziazio-esparruak ireki behar dira".