Gaur egin dute Enplegu Erregulazioko Espedientearen negoziazio epearen azken bilera eta Guardian enpresako zuzendaritzak eta langileek ez dute adostasunik lortu. Izan ere, sindikatuen iritziz, multinazionalak ez du arrazoi objektiborik eskaini justifikatzeko Laudioko faktoriaren itxiera eta, ondorioz, 171 kaleratzeen espedientea. Salatu dutenez, kalte ordainak onartzea izan da zuzendaritzak eman dien aukera bakarra.
Astelehenean egin zuen bere azken eskaintza Guardianek eta langileek proposamenari uko egin zioten berriz ere.
Kaleratzeen judizializazioa
Hasteko, ELA sindikatuak salatu du espedienteari buruzko kontsultaldia akastuna izan zela, labea modu irregularrean itzali zelako.
Horrez gain, sindikatu horrek aipatu du inoiz ez dela egon industria proiekturik lanpostuak bermatzeko: "Multinazional amerikarrak 2020an iruzurrezko salmentarekin eta 2024ko uztailean Autoglaseko langileen kaleratzearekin hasitako zirkulua itxi nahi du".
Bestalde, sindikatuak oso kritikoak izan dira Eusko Jaurlaritzaren jarrerarekin prozesu osoan eta salatu dute enpresaren eskutik joan direla.