Laudioko lantegia ixteko Guardianeko zuzendaritzak eginiko proposamenaren alde lerratu dira langileen gehiengoa. Modu horretan, multinazionalak proposatutako kalte ordainak onartu dituzte, eta uko egin diote epaitegietara joateari, nahiz eta hori izan enpresan ordezkaritza duten bi sindikatuen (ELA eta LAB) hasierako asmoa. Bi sindikatuen asmoa zen auzia judizializatzea, itxieraren arrazoi objektiborik ez dagoela argudiatuta.
Gaur eguerdian eginiko batzarraren ostean egin dute bozketa, eta emaitza oso estua izan da ekoizpenean diharduten beharginen artean: 67k bozkatu dute zuzendaritzaren proposamenaren alde, eta 65k ezetz. Buruzagien artean, aldiz, 30ek bozkatu dute proposamenaren alde, hiruk ezetz, eta batek bozka zuria eman du.
Modu honetan amaituko da Guardianek urtarrilean abiatutako itxiera prozesua. Urtarrilaren 20an iragarri zuen enpresak Laudioko fabrika ixteko asmoa zuela, eta hurrengo astean ekin zion labea itzaltzeari. Langileak kaleratzeko espedientea, aldiz, martxoaren 3an aurkeztu zuen zuzendaritzak, eta ordutik hona hainbat bilera egin ditu Enpresa Batzordearekin, baina adostasunik lortu gabe.