LABek ere oharra plazaratu du Guardianeko langileen gehiengoak hartutako erabakiaren aurrean. Sindikatuak nabarmendu du "kontrako jarrera argia eta sendoa" izan duela prozesuaren hasieratik, eta "ezinbestekoa" zela bide juridikora jotzea. "Hala ere, enpresak prozesua kalte ordainekin bakarrik ixteko egindako presioek eragina izan dute: langileen gehiengo batek eskainitako kalte-ordaina onartzea erabaki du, eta, horrela, bide judizialetik jarraitzeari uko egin dio", azaldu du langile erakundeak.
Gauzak hala, LABeko kideek uste dute Guardianek "azken unera arte" jokatu dituela bere kartak, "higadura eta ziurgabetasuna erabiliz borondateak menderatzeko, pertsonen bizitzarekin eta lanpostuekin jolastuz". Horren aurrean, sindikatu abertzaleak aldarrikatu du ezin dela halakorik gertatu, eta "inpunitate osoz jardutea" ekidin behar zaiela multinazionalei.
Horrez gain, erakunde publikoen jarrera ere salatu du LABek, Eusko Jaurlaritzak "ikusle soila" izatea erabaki duela nabarmenduta: "Pasibotasun instituzional horrek multinazional handien boterea indartzeko baino ez du balio, gure herrialdeko ehun produktibo eta sozialaren kontura".
Sindikatuko kideek ziurtatu dute "erakundeen ate posible guztiak" jo dituztela, baina "ekintza eza" baino ez dutela aurkitu, "prentsan egindako adierazpenetatik harago". Horren aurrean, aldarrikatu dute jarraituko dutela "langile klasearen eskubideak" defendatzen eta "pertsonen zerbitzura egongo den" industria politika eskatzen.