Podemos Euskadi ere batu da Guardian ixteko akordioak sortutako erreakzio olatura. Alderdi politikoak errespetatu egiten du langileek hartutako "erabaki zaila", baina nabarmendu du ez dutela beste aukerarik izan, Eusko Jaurlaritzak "proposamen eta plan industrialik" egin ez duelako.
Talde moreak nabarmendu du hau dela borroka honek izan zezakeen "amaierarik txarrena", eta Laudioko beira fabrikaren itxiera "beste kolpe gogor bat" izango dela eskualdearentzat, "ziztu bizian desindustrializatzen eta pobretzen" ari dela ohartarazita.
Horren aurrean, hainbat erantzule seinalatu dituzte talde politikoko kideek. Euren ustez, EAJk, PSEk eta PPk Europar Batasunean sustatutako politika neoliberalak dira gertatutakoaren errudunak. "Izan ere, gure enpresak ezin dira lehiatu soldata baxuko eta ingurumen araurik gabeko herrialdeekin, eta gure enpresa sarea inbertsio funtsek eros dezakete", azaldu dute. Horren aurrean, merkataritza itunetan "ispilu-klausulak" txertatu behar direla aldarrikatu dute, eta gobernuek "partaidetza garrantzitsuak" eskuratu behar dituztela "enpresa estrategikoetan".
Nabarmendu dutenez, eurek urteak daramatzate Eusko Legebiltzarrean hori proposatzen: "2021eko, 2022ko eta 2023ko aurrekontuetan, Podemosek proposatu zuen Euskal Funts Subirano bat sortzea, urtean 500 milioi eurokoa, enpresa estrategikoen, startupen edo arriskuan dauden enpresen akziodun izateko, lehiakorragoak izateko eta industria lurraldera errotzeko. Ez ziguten inoiz kasurik egin, baina orain Imanol Pradales lehendakariak gauza bera eskatzen du bere Finantza Aliantzarekin. Okerrena da Guardian eta bere 171 langileentzat berandu datozela dirudiela".