Kaleratu dituzte dagoeneko Guardianeko langile gehienak. Asteartean sinatu zuten akordioa enpresa batzordearen eta zuzendaritzaren artean. Dokumentu horren bidez, langileak konprometitu dira kaleratzea epaitegietara ez eramatera eta, trukean, zehaztutako kalte ordaina emango die zuzendaritzak.
Hori sinatzearen alde lerratu ziren behargin gehienak iragan ostiralean eginiko asanbladan, sindikatuetako ordezkariak aurka egon arren.
Bozketa horri eta aurreko prozesu guztiari buruz mintzatu da Aitor Peral gaur eguerdian Azalera podcastean. LABeko ordezkariak gaur goizean bertan sinatu du bere kaleratze gutuna, eta jarraian eskaini dio elkarrizketa Aiaraldea Komunikabideari.
Enpresa ez dute disolbatuko
Peralek azaldu duenez, oraindik 14 behargin geratzen dira enpresan. Horietako sei hilabete amaierara arte egongo dira lanean, eta beste zortziek (zuzendaritzako zenbait kide eta segurtasun arduraduna, besteak beste) enplegua mantenduko dute momentuz. Izan ere, Laudioko lantegiaren atzean dagoen enpresa juridikoa (Guardian Llodio S.L.) ez dute disolbatuko. "Ez dakigu hemendik urtebetera edo hiru urtera disolbatuko duten edo mantenduko duten", azaldu du enpresa batzordeko kide ohiak.
Erantzuteko, izena emanda egon behar duzu eta horretarako baimenak eduki behar dituzu. Sartu komunitatera!