Atzo Arabako Batzar Nagusietan egindako eztabaida politikoak Laudio eta Aiaraldea izan zuen hizpide. Izan ere, Eva Lopez de Arroyabe EH Bilduko bozeramaileak Ramiro Gonzalez Ahaldun Nagusiari galdetu zion Aiaraldeko Larrialdi Planari buruz eta EAJko ordezkariak erasoan erantzun zuen.
Lehenik eta behin, Gonzalezek aipatu zuen Arabako Foru Aldundiak plan horretan aurreikusitakoaren %104 gastatu duela. Horrez gain, Lamuzako parkean egindako esku-hartzea, Saratxo saihesbidea eta Kexaako monumentuaren erosketa gogoratu zituen.
Halaber, inbertsio handiagoak egingo dituela azpimarratu zuen, Ikus-entzunezko Hub bat aurreikusita baitute Aiaraldean. Zentro berriak plato birtual bat, ekoizpen espazioak, prestakuntza aretoak eta filmaketa eremuak izango ditu, ohar bidez argitu dutenez.
HAPOren aurrerakina
Hori aipatuta, Ramiro Gonzalezek aldarrikatu zuen Aldundiak egiten duena balio gutxi izango duela tokiko erakundeek oztopoak jartzen badituzte eta horrela erreferentzia egin zion Laudioko Udala aurkezten ari den Hiri Antolakuntzako Plan Orokorrari.
Gonzalezek aipatu zuen egun hauetan Aiala Vidriorekin elkarlanean ari direla 75 milioi euroko inbertsioa egin dezaten, eta Laudioko enpresa batek bere kezka adierazi diela HAPOko aurrerakinak zoru industrial kopurua murriztu duelako.
Ahaldun Nagusiak egotzi zion Laudioko EH Bilduko udal taldeari enpresak kanporatzea udalerritik eta horregatik exijitu dio HAPO birpentsatzea.
Atzoko adierazpenak oposizioak egindako salaketarekin lotu zuen zuzenean Gonzalezek.