Orbeko Etxeak 24 urteko ibilbidea beteko du ekainean eraikin okupatu gisa eta hamaika jarduerekin ekingo diote ospatzeari. Hiru asteko egitaraua prestatu dute horretarako eta adin guztien nahiak asetzeko eskaintza egongo da.
Igandean izango da lehen hitzordua, eta horretarako Mikel Urkixok idatziko Euskal Herria Underground: 1986-2015. Bidaia elektroniko bat liburua aurkeztuko dute. 12:00etan abiatuko dute solasaldia eta bermuta, herri bazkaria eta musika emanaldiarekin jarraituko dute, 20:00ak arte.
Tokiko artista protagonistak
Hurrengo ekintza ekainaren 12an izango da. Eskualdeko sortzaileek hartuko dute oholtza modu nahiko librean: Shashel Calderon olerkariak errezitaldia egingo du bibolinak lagunduta, Iaiaiai irrintzilari taldeak emanaldia egingo du eta Igor Arzuagak ere joko du. Hainbat disziplina ere uztartuko dituzte 19:00etatik aurrera.
Hurrengo egunean umeen txanda helduko da eta 17:00etatik aurrera Txiki Punk ekimena eskainiko diete gune anitzekin, tailerrekin, txokolate janarekin eta puzgarriekin.
Larunbata, aldiz, musikarako unea izango da. 17:30ean hasiko dira taldeak oholtzara igotzen eta muturreko soinuak jorratzen. Banden artean etxearekin harreman estua izan duten proiektuak egongo dira, Ira Et Decessus eta Fly Shit, esaterako. Troika, Korasek, Kiratxa, Xispa and The Wild Pigs eta Parentesis 536 taldeek ere joko dute.
Suberri
Ekainaren 16an Suberri gazte asanbladak arratsalde berezia eskainiko du, patin topaketa eta askaria iragarri baitituzte.
Hurrengo egunean Enemigos del Imperio liburuaren aurkezpena aurreikusi dute. Halaber, errepresioaren kontrako txostenaren berri emango dute.
Ekainaren 19an, ostegunean, beste kontzertu bat antolatuko dute, Stone Leek talde japoniarrak punk eta hardcore doinu melodikoak eramango ditu Orbeko Etxera eta eurekin batera Erruki Jauna tokiko banda arituko da.
Orbeko Party
Azkenik, jai bitxia egingo dute ekainaren 21ean, larunbata. Bermuta, bazkaria eta bingo musikatuarekin batera, Crust Fit lehiaketa antolatuko dute, basket xtrem, igela, ping pong eta tokan jolasteko.
Iluntzean, aldiz, queimadaren, DJ Peruren emanaldiaren eta Noizean Noise kolektiboaren musika saioaren txanda helduko da.