Astelehenean ez zen medikurik egon Laudioko Etegabeko Arreta Gunean (EAG). Hala salatu du LABek, eta ohartarazi du egoera hori errepikatuko dela abuztuaren 15ean eta 17an; hau da, jaietako Txupinazo eta San Rokezar egunetan, lehenago "zuzentzen ez bada".
Sindikatuko kideek nabarmendu dute tenperatura altuak aurreikusten direla egun horietarako. "Horren aurrean, Eusko Jaurlaritzak ziurrenik alarma motaren bat ezarriko du. Onartezina da Osakidetzak eskualdea baztertzea; izan ere, baliabide sanitario nahikorik gabeko jardunaldietan egoera latzak jasan dituen eskualdea da", salatu dute.
Murrizketa horiek "hain data seinalatuetan eta tenperatura itogarriekin egitea" ere deitoratu dute, horrek "ahultasun-egoera" sortzen duelako "Laudioko biztanle guztientzat". Gauzak hala, egoera zuzentzea eskatu diote Osakidetzari, EAG guztietan lan-talde osoa egotea bermatuz.
Herritarrei, aldiz, egoera salatzen jarraitzeko deia luzatu diete, eta baita prebentzio neurri pertsonalak areagotzea ere.
Osasun baliabide gabezia presente egon zen iaz ere Laudioko jaietan. Pertsona bat hil zen bihotzekoak jota, Zainketa Intentsiboetarako Unitate mugikorrean medikurik ez zegoen une batean, eta gertatutakoa salatzeko etenaldia egin zuten festetan.