Eguerdian elkarretaratzea egingo dute langileek Herriko plazan, eta arratsaldeko zazpietan eskualdeko mobilizazioa egongo da Eroskiko biribulgunetik abiatuta.
Petardo hotsekin esnatu da gaur goizean Laudioko Industrialdea. Goizeko bostetan hasi dira Maderas de Llodioko langileak biltzen fabrikaren atarian eta, asteartean bezala, inguruko beste lantegi batzuetako beharginak ere batu dira piketera. Voestalpine-JEZ lantegiko langile ugarik, adibidez, klaxona joz animatu dituzte grebalariak, gaueko txandatik atera direnean.
Bigarren greba eguna dute gaurkoa Maderas de Llodioko langileek, Garnicak (Laudioko lantegiaren jabea den enpresa taldeak) egin nahi dituen 39 kaleratzeen aurka. Astearteko egoera berdina errepikatu da gaur goizean: lanuztearen jarraipena erabatekoa izan da, ez baita beharginik sartu fabrikara.
Mobilizazioa arratsaldean
Egun bizia izango dute gaur grebalariek. Eguerdiko hamabietan Herriko plazara jaitsiko dira, bertan elkarretaratzea egiteko, merkatu eguna dela baliatuta. Arratsalderako, aldiz, mobilizazioa deitu dute SOS Aiaraldearekin batera, 19:00etan Eroskiko biribilgunetik abiatuta.
Bisitatzen ari zaren webgune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.
Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.
Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.
Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.
Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.
