Iragan osteguneko mobilizazioan eman zuten albistea, eta gaur egin dute urratsa: Greba mugagabean jarri dira Maderas de Llodioko langileak, Garnica taldeak egin nahi dituen 39 kaleratzeen aurka.
Goizeko bostetan bildu dira beharginak fabrikako sarreran. Ez dute eguraldia lagun izan, zirimiri etengabea egon baita. Hala ere, grebalariez gain, inguruko beste lantegietako kideak edota eskualdeko bizilagunak bertaratu dira piketera.
Aurreko astean bezala, gaur ere erabatekoa izan da grebaren jarraipena, goizeko txandan behintzat, ez baita inor sartu lantegira.
Mobilizazioak aste osoan
Langileek eskualdeko herritar guztiei luzatu diete greba mugagabeko deialdietan parte hartzeko gonbita. Egunero egingo dituzte piketeak txanda aldaketetan (5:00etan, 13:30ean eta 21:30ean).
Horrez gain, beste mobilizazio batzuk ere egingo dituzte. Gaur, adibidez, "ERE-rik EZ! Ongi etorri" deitu dute lantegiaren aurrean goizeko bederatzietarako, zuzendaritzaren eta Enpresa Batzordearen arteko bilera egingo den unean.
Asteazkenean, aldiz, eskualdeko komiteekin egingo dute protesta, 12:00etan, toki berean. Bukatzeko, ostegunean herrira jaitsiko dira 11:30ean, eta Herriko plazan egingo dute elkarretaratzea.
