Asteburuan jai giro euskaltzalea nagusituko da Laudion, Euskal jaiarekin. Aurreko urteetan bezala, udalerriko hainbat eragilek batu dituzte indarrak, ostiraletik igandera arte luzatuko den egitaraua osatzeko.
Ostiral arratsaldean egingo dituzte lehen jarduerak: umeentzako tailerrak eta txokolate jana. Larunbatean, aldiz, goizetik gauera arte luzatuko da programa. Baserritarren azoka, herri kirolak eta irrintzi txapelketa egongo dira lehen bizi. 14:30ean herri bazkariaren txanda iritsiko da. Otordurako tiketak 10 euroren truke eskuratu daitezke, El Lio tabernan.
Bertsolariak arduratuko dira bazkalostea animatzeaz. Aroa Arrizubieta, Gorka Pagonabarraga eta Peru Abarrategi arituko dira mikrofono aurrean inprobisatzen, Serapio Lopezek planteatutako gaietatik tiraka.
Ondoren, mus txapelketa eta kantukadarekin girotuko dute arratsaldearen hasiera, eta musika eskaintzarekin itxiko dute eguna, Orekka erromeriaren eta Pakita Penas DJen eskutik.
10.000 kilometro baietz!
Igandea ere egun bizia izango da. Izan ere, 10.000 kilometro baietz! ekimenaren hirugarren edizioa egingo dute, 9:00etatik 19:30era. Euskararen aldeko egitasmo hori 2021ean egin zen lehenbiziko aldiz, Laudio Ikastolaren eskutik. Aurten, aldiz, herriko ikastetxe guztiak batu dira antolakuntzara.
Zumalakarregi etorbidean ibiltzean datza egitasmoa, parte hartzaile guztien artean aipatutako erronkara iristeko. Arloteek, euren aldetik, emanaldia eskainiko dute eguerdian.