Kontsulta epeko laugarren bilera izan dute gaur Maderas de Llodio enpresako langileek eta Garnica taldeko ordezkariek eta, momentuz, konpainiak ez du jarrera aldaketarik izan.
Izan ere, Langile Batzordeak proposamenak eraman ditu negoziazio mahaira ekoizpenaren %40 lekuz ez aldatzeko eta 39 kaleratzeak ekiditeko, baina zuzendaritzak ez du ezer jakin nahi izan, beharginen ordezkariek salatu dutenez. Halaber, zenbait galdera egin dituztela aipatu dute, oraindik erantzunik jaso ez dutela nabarmenduta.
Batzarra amaitu denean, goizeko lehen orduetan bezala, grebalariek desadostasuna islatu dute lantegiko sarreran eta eserialdia egin dute zuzendaritzako autoen aurrean. Ertzaintza bertaratu da horren ondorioz, baina ez da inolako istilu edo identifikaziorik egon.
Prentsaurrekoa astelehenean 11:00etan
Langileek errepikatu dute ez dagoela arrazoi objektiborik Garnicak 39 behargin kaleratzeko eta lanpostuen defentsan jarraituko dutela iragarri dute.
Halaber, irailaren 29an, astelehenean, prentsaurrekoa deitu dute 11:00etan lantegiaren sarreran eta jende orori luzatu diote bertaratzeko gonbita.
Bideoko irudiak: LAB Aiara