Goiz lasaia izan dute gaur Maderas de Llodioko lantegiaren sarreran. Greba mugagabea abiatu zenetik gertatu bezala, jende ugari zegoen sarreran, gaur Enplegua Erregulatzeko Espedientearen kontsulta epeko bilera berria baitzuten adostuta Garnica taldearen eta langileen ordezkarien artean. Baina konpainiako zuzendaritza ez da agertu.
Gaur, batzarraren orduan,10:00etan, sindikatuetako kideek sarrerara jo dute eta kontrol puntuan jakinarazi diete barruan ez zegoela Garnicako inor.
Modu horretan heldu zaie beharginei zuzendaritza ez dela Laudion agertu. Berez, atzo enpresa saiatu zen bilera on-line egiten, baina sindikatuek erantzun zuten hitzordu oso garrantzitsua zela eta aurrez aurre egin behar zela, aurreko batzarrean adostu bezala.
Are gehiago, beharginen ordezkariek kudeaketak egin zituzten Laudioko Udaletxean elkartzeko, baldintza guztiak beteko zirela bermatzeko. Ordea, Garnica taldeko arduradunek ez zuten ezer adostu eta gaur ez dira Maderas de Llodiora bertaratu.
Greba mugagabeak jarraitzen du indartsu; bihar Logroñon eta ostegunean Gasteizen
Zuzendaritzak ez duenez ezer jakinarazi aldez aurretik, jende ugari batu da Maderas de Llodio lantegiko sarreran, protesta egiteko iragarritako 39 kaleratzeen aurka.
Grebalariak ez ezik, beste enpresetako beharginak zein ikasleak elkartu dira eta grebalari batzuek fabrikako sarreran badmintonean jokatzen eman dute itxaronaldia.
Bihar, langileek Logroñora eramango dituzte euren aldarrikapenak, Garnica taldeko kapitalaren zati handi bat Errioxakoa baita. Ostegunean, aldiz, Eusko Legebiltzarraren aurrean egingo dute elkarretaratzea eta Arabako Batzar Nagusietan hartuko dute hitza, erakunde publikoen inplikazioa exijitzeko.