Gaur egin dute Maderas de Llodioko Enplegua Erregulatzeko Espedientearen kontsulta epearen bosgarren bilera, baina ez da aurrerapausorik egon, Enpresa Batzordeko kideen hitzetan. Langileen ordezkarien arabera, zuzendaritzak ez ditu oraindik behar bezalako azalpenak eman ekoizpenaren %40a kanpora eraman eta 39 langile kaleratzeko asmoaren arrazoien inguruan.
Sindikatuek, euren aldetik, hainbat proposamen jarri dituzte mahai gainean alternatiba moduan, baina enpresak ez ditu aukera horiek aztertu oraindik. Gauzak hala, beste bi bilera hitzartu dituzte datorren asterako. Astelehenean izango da lehena 15:00etan eta ostegunean bigarrena, 10:00etan.
Gaurko bilera Gasteizen izan da. Izan ere, Garnica taldeko buruak ez ziren asteartean fabrikan deitutako bilerara bertaratu. Bilera telematikoki egitea eskatu zuen zuzendaritzak, langileen protestak zirela eta, baina sindikatuek uko egin zioten aukera horri, bilera garrantzitsua zela argudiatuta.
Ondorioz, hurrengo asteko bilerak ere eskualdetik kanpo egingo dira, Bilbon. Hala ere, langileak ere Bizkaiko hiriburura joateko deia zabaldu dute bi egunetan. Asteazkenean, aldiz, manifestazioa egingo dute 11:30ean, Herriko plazaraino.
