Laudioko alkateak Azalera magazinean pasa den astean aitortu zuenez, uste zuten Kultura Etxearen inaugurazioa hurbil egongo zela data hauetan, baina eraberritze lanetan agertu diren zenbait akatsek atzeratu dute prozesua.
"Akats batzuek ez dute garrantziarik, baina beste batzuek kezka sortzen digute", adierazi du Ainize Gastakak. Udalburuak argitu du ez dela lehenengo aldia egoera jazotzen dela: "Kasinoa ireki zenean hezatasun arazoak zeuden eta oraindik ez dira desagertu".
Gauzak horrela, Laudioko Udalak argitu nahi du noren ardura izango den akats horien konponketa eta hori adostu arte ez dutela Arabako Foru Aldundiarekin lagapen hitzarmena sinatuko.
Kudeaketa eredua eta Kultura Etxearen filosofia
Bide hori egin bitartean, dena den, Kultura Etxeari dagokizkion bestelako erronkak ere badaude. Alde batetik, azpiegiturak izango duen kudeaketa eredua. Bestetik, lehen eraikin horretan zeuden talde guztiei egitea gonbidapena hara itzultzeko.
Halaber, alkateak ez dio atea itxi sorkuntzaren esparruan aritzen diren bestelako eragileei proposamen bera egiteari.
Laudioko Kultura Etxea berpizteko hausnarketa saioak
Kudeaketa ereduaren esparruan, Kulturlabek eta tokiko erakundeak bost hausnarketa saio antolatu dituzte. Iñaki Larrinbe artistak eta ZAS espazioko kideek bideratuko dituzte eta urrian 31tik azaroaren 28ra ostiralero elkartuko dira 17:00etan Kultura Etxean bertan.