Josu Vaquerizo laudioarrak jarraitzen du ikus-entzunezkoak sortzen eta larunbatean Weyauwega International Film Festival estatubatuarrean proiektatu eta gero, pelikula labur onenaren saria jaso du.
Zuzendariak aitortza eskuratu zuen han ere duela hiru urte bere aurreko filmarekin: Life in the XXI Century. Vaquerizok, bitxikeria moduan, aipatu du biek 42 minutu irauten dutela. Hori bai, hor amaitzen dira antzekotasunak.
Izan ere The Glass Magazine proiektuarekin aurreko zientzia fikzioko joera apurtu eta bestelako generoan egin ditu probak. "Hau errealistagoa da, emakume gazte bati buruzkoa da, musika esperimentala egiten du, supermerkatuetan lapurtzen du eta modu alternatiboan bizi da", aipatu du sortzaileak.
Vaquerizok bizi den hirian grabatu du pelikula, Brightonen, alegia, eta berak egin ditu lan tekniko eta artistiko gehienak, ez baitu aurrekonturik izan.
Bi film gehiago bidean
Pelikula berria izanda ere, zuzendari laudioarrak ez du atsedenik hartu eta beste bi proiektutan buru-belarri sartuta dabil. Alde batetik, beste film labur bat grabatzen ari da eta % 75 inguru egin du jadanik.
Bestetik, Karen Nikgoli buruzko dokumentala sortzen ari da. Artista hori margolaria eta antzerki esperimentaleko zuzendaria zen eta irandar-armeniar-norvegiarra zen.
Bideoklipa
Gainera, Codex Serafini taldearen bideoklipa ere ekoiztu du Josu Vaquerizok eta duela astebete sareratu dute.