Greba mugagabearen 132. eguna bete dute gaur Maderas de Llodioko langileek. Ehunka lagun batu dira arratsaldean herriko kaleak zeharkatu dituen manifestazioan. 35 behargin kaleratu eta ekoizpenaren zati handi bat eskualdetik kanpo eraman nahi duen Garnica konpainiaren asmoak gelditzeko eskatu dute.
Irailetik geldirik dagoen fabrika barruraino eraman dute aldarrikapena langile eta herritarrek. Manifestazioaren buruak Maderas de Llodioko azpiegituretara sartu eta Garnicari "konponbidea orain" exijitzen zion pankarta erraldoia eskegi dute.
Tentsio uneak ere bizi izan dira Ertzaintza ekitaldi amaieran fabrikara sartu eta bertan bildutakoak kanporatzen hasi denean. Poliziak behargin bat identifikatu du.
Guardianen itxieraren urteurrena
Maderas de Llodioko langileen aldeko manifestazioak Guardianeko labearen itzalketaren urteurrenarekin egin du bat. 2025eko urtarrilaren 29an behin betiko amatatu zuten Laudioko fabrika historikoaren bihotza zen labea, eta bertako 171 langileak kaleratzeko prozedura abiatu zuten.
