Maderas de Llodioko lan gatazka Espainiako Auzitegi Gorenera helduko da. Izan ere, enpresak hedabideen bitartez aurreratu du horretarako asmoa duela eta helegitea aurkeztuko duela.
Egur konpainiako beharginen ordezkariek komunikabideen bitartez izan dute Garnicaren ideiaren berri. Edonola ere, langile erakundeek ere bazuten Madrilgo epaitegira jotzeko intentzioa, LABek eta ELAk gutxienez.
Bi aldeen helburuak, nola ez, erabat kontrajarriak dira. Garnicaren xedea da kaleratzeak bidezkotzat jotzea eta sindikatuena, aldiz, nuluak izatea, langileak nahitaez berriro kontratatu ditzaten. Berez, exijentzia hori egin zuten pasa den astean epaia oinarri hartuta, baina nuluaren bitartez enpresa behartuta egongo litzateke beharginak berronartzera.
Eusko Jaurlaritzaren, Garnicaren eta sindikatuen arteko bilera laster
Bide hori lantzen ari diren bitartean, zuzendaritza eta langileen ordezkariek batzarra izango dute hurrengo astean. Hain zuzen, Eusko Jaurlaritzako Ekonomia, Lan eta Enpleguko Saileko kideek parte hartuko dute elkarrizketetan bitartekari gisa.
Ikusteke dago bilerak gatazka bideratzeko balioko duen ala ez. Bitartean, grebalariek 159 eguneko lanuzteari ekin diote gaur eta bihar Errioxara eramango dute protesta, Garnicak Bañosen dituen azpiegituretara.