Laudioko EAJk oharra plazaratu du bere haserrea adierazteko Udalak pasa den astean argitaratutako oharrarekin. Izan ere, testu horretan tokiko erakundeak zabaldu zuen beste erakunde publikoei eskatu diela bilera horretan agertutako arazoak konpontzeko eskaera.
Jeltzaleek beste prentsa ohar batekin erantzun dute eta exijitu diote udal gobernu taldeari bere gain hartu behar dituen ardurak hartzeko. "Idazkiak bidaltzera mugatzea ezin da auzotarren kezken aurrean erantzun politiko bakarra izan", aipatu du Maite Cortazar zinegotziak.
Hain zuzen, EAJk galdetu du ea zer gertatzen den auzo batzarretan agertu diren udal eskumeneko gaiekin: "Hiri-mantentzea, bide-garbiketa, espazio publikoen kontserbazioa, kartelen eta pintaden kontrola, hobekuntzak auzoetan edo tokiko eremuko segurtasun- eta mugikortasun-arloko jarduerak".
Halaber, jeltzaleek galdetu dute ea zer gertatzen ari den partaidetzaren bidez abiatutako beste proiektu batzuekin: "Skate park, haur-parkeak hobetzeko plana eta industrialdeetako jarduketak, eraldaketa digitaleko proiektuak, Ugarteko eremuaren estalkia edo argiteria publikoaren ordezkapena (...) Latiorro sumendiaren inguruko jarduketa eta Arraño auzorako hirugarren sarbidea".
Bukatzeko, EAJk berretsi du prest dagoela Laudioko auzoetarako benetako hobekuntzak dakartzaten ekimenetan laguntzeko, baina gobernu-taldeari "iragarki gutxiago eta kudeaketa eraginkor gehiago" eskatu dizkio.