Guardian eta Glavistaren berrirekierarako balizko akordioari buruzko adierazpenak egin ditu Mikel Jauregik, hedabideetan agertutako "filtrazioen" aurrean. Industria sailburuak "zuhurtziaz" jokatzea eskatu du operazioa behar bezala ixteko, baina hainbat datu berri ere plazaratu ditu.
Bere hitzetan, 400 lanpostu berri sortuko lituzke akordioak Aiaraldean, eta 80 eta 85 milioi euro arteko inbertsioa eragingo luke.
Honako hau izan da sailburuaren komunikatua, hitzez hitz:
Aiaraldeako Guardian eta Glavista lantegietarako bi inbertsore industrialekin adostasuna lortzear gaude. Nahiz eta diskrezioa eskatu dugun, filtrazioak izan dira. Berriro ere, zuhurtziaz jokatzea eskatzen dugu operazio hau behar bezala ixteko.
Akordio honek 80 eta 85 milioi euro arteko inbertsioa suposatuko luke eta 400 lanpostu sortuko lituzke Aiaraldean. Horrela, Aiaraldeko industria instalazio handienetako bati irteera eta etorkizuna emango genioke. Hilabeteak daramatzagu negoziazio oso konplexuetan, alderdi desberdin arteko akordioak lortzeko.
Eragiketa ixteko, zortzi aurreakordio sinatu behar dira, beraien artean baldintzatuta daudenak. Edo dena adosten da edo ez dago adoztazunik. Eusko Jaurlaritzari eta Arabako Foru Aldundiari dagozkion aurreakordioak sinatuta daude. Alde guztiei erantzukizuna eskatzen diegu, beraien aurreakordioak ixteko.
Aiaraldeak eta bere etorkizun industrialak merezi du eta.
Vocento taldeak filtratu du balizko akordioaren albistea gaur goizean, eta Aiaraldea Komunikabideak informazioa berretsi ahal izan du. Informazio horren arabera, VSF eta Gaviota konpainiak daude operazioaren atzean, Javier Garcia Marquez enpresariarekin batera.