Salhaketa eta Katearen Loturak elkarteek mobilizazioa egingo dute ostiralean 12:30ean Andra Mari Zuriaren plazan. Zaballan jazotako gazte laudioar baten heriotza salatzea izango da protestaren helburua.
Adierazi dutenez, "Hego Euskal Herriko espetxe ezberdinetan gertakari bereziki larriak jazo dira, besteak beste, 3 preso hil dira (2 gazte Zaballako espetxean eta 80 urteko pertsona bat Iruñan)". Elkarteentzat, arazoaren muina preso gehienek maila ezberdineko patologia duala dutela da, hau da, buru osasun eta menpekotasun arazoak pairatzen dituztela.
Aiaraldea Komunikabideak galdetu dio Salhaketari eskualdeko gaztearen egoera hori ote zen. Elkarteak erantzun du ez duela daturik hori ziurtatzeko, baina arreta jarri nahi izan du egoera orokorrean. Izan ere, Salhaketak eta Katearen Loturakek aipatu dute presoen %70ak duela patologia duala.
“Espetxe sistema de facto funtzionatzen ari da existitzen ez diren edo nahikoak ez diren osasun eta gizarte bitartekoen ordezko baliabide gisa”, azpimarratu dute.
Arartekoari deia
Elkarteen iritziz, azken hilabeteetan gertatutako heriotzak ez dira isolatuak eta egiturazko arazoa azaleratzen dute. Hori dela eta, Arartekoak esku hartu dezan exijitu dute: "Gertaera horiek iker ditzaten, espetxean patologia duala duten pertsonen egoera ebalua dezaten eta drogarik gabeko ingurune batean arreta integrala eta jarraitua bermatuko duten premiazko neurriak susta ditzaten, gaur egun espetxea libre ez dagoen drogen ingurune horretan, hain zuzen".