Ainize Gastaka Laudioko alkateak pasa den astean bisitatu zuen Azalera podcasta eta egindako elkarrizketan aurreratu zuen Goikoplazan babes ofizialeko 80 etxebizitza baino gehiago eraikitzeko lanak hastear daudela.
Hain zuzen, udalburuak argitu zuen ostiralean hustu behar zela eremua, hesitu baitute jadanik. Udalak lursaila laga zion Eusko Jaurlaritzari eraikin horiek egiteko eta espero dute 14 hilabetetan amaitzea.
Aparkaleku berriak Latiorron
Gastakak ohartarazi zuen azpiegitura horiekin aparkaleku ugari desagertuko direla herrigunean, baina, aldi berean, gogoratu zuen hilabete barru eremu berria irekiko dutela horretarako Latiorron.
Ibilgailuak uzteko gune hori anbulatorio berrira lotuta egongo da. Beti izango da doakoa, baina hasieran denbora-mugarik ez bada egongo ere, Udalak aztertuko du zein mugimendu mota sortzen den eta horren arabera erabakiko du erabilera orduak murriztea, osasun sistema publikora jotzen dutenei lehentasuna emateko.
Ugarten estalkirik ez
Azaleran egindako adierazpen aipagarrien artean badago ere Ugarteko auzokideek hainbat aldiz egindako eskaera ez dela bideragarria. Izan ere, URA Agentziak debekatu du futbol zelaian estalkia jartzea.
Alkatearen iritziz pena bat da, "tokia jarduera komunitarioak egiteko baliatu ahal zelako".
Apaloetako mahaiak
Hiriko elementuekin jarraiki, Gastakak iragarri zuen urtea amaitu baino lehen Apaloetan dauden metalezko 20 mahaia kenduko dituela Udalak. "Urbanizazioa egin zenean ideia ona iruditu zitzaien, baina bizilagunek azaldu dute metalezko mahai horiek arriskutsuak direla umeentzat, hortaz, erretiratuko ditugu".