Laudioko Larrazabal auzuneko bizilagunek, Aiaraldeko Mendiak Bizirik plataformaren parte hartzearekin, Industria Sailean gora jotzeko errekurtsoa erregistratu dute Ferosca I zentral eolikoaren kontra.
Gogoratu beharra dago proiektu horrek aldaketa nabariak izan dituela eta Aiaran aurreikusitako aerosorgailuak debekatu dituela Jaurlaritzak, baina Laudioko esparruan aurrera egiten jarraitzen du egitasmoak.
Hori dela medio, Larrazabalgo herritarrek errekurtso tekniko eta juridikoa prestatu dute, euren ustez proiektuak ez duelako legedia betetzen, lurzorua ez delako egokia eta bere kalifikazioa ez delako aldatu. "Herritar batek etxola bat eraikitzeko legea bete behar du. Enpresa betek ere bai", nabarmendu dute.
"Herritar batek etxola bat eraikitzeko legea bete behar du. Enpresa betek ere bai"
Argudio nagusiak
Auzokideen zein plataformaren iritziz, proiektuak kalte handiak eragingo ditu eta Industria Saila legearen interpretazioa behartzen ari da. Alegia, aiaraldearrek azpimarratu dute Ingurumen-Inpaktuaren Adierazpen Estrategikoak eta Lurralde Zati Planaren hasierako onarpenak ez dutela balio izaera pribatuko proiektu bat "interes publikokoa" bilakatzeko. "Soilik sustatzaile publikoek egin dezakete hori eta inoiz ez eremu babestuetan", nabarmendu dute.
Halaber, erantsi dute herritarren parte hartzea ez dela erraztu eta informazioaren kudeaketa ez dela gardena izan.
Hori guztia aintzat hartuta, aldarrikatu dute errekurtsoa badela modu bat prozedura ondo egin dadin, legea errespetatuta.
Egindako salaketa ez da ezustekoa izan, martxoan bilera deitu baitzuten gaia jorratzeko.