Josu Vaquerizo Britaina Handian bizi den zinemagile laudioarra gonbidatu du Mammoth Lakes Film Festival jaialdiak, aurtengo edizioan parte har dezan. Maiatzaren 20tik 25era bitartean egingo dute ekimena eta Kaliforniako toki menditsuan (ekialdeko mendizerran) izango da, non eski estazioa dagoen.
Zuzendariak ezuste atsegina izan du, festibalak oso balorazio positiboak baititu zinemaren munduan. Azken urteetan, besteak beste, Robert Pattison antzezlearen Damsel filma aurkeztu dute bertan, baita Netflixen Abducted in Plain Sight dokumentala ere.
Movie Maker Magazine aldizkariak jaialdi onenen artean izendatu du hainbat urtez eta antolatzaileek eurek zabaldu dute zinema industrian harremanak egiteko toki egokia dela.
'The Glass Magazine'
Vaquerizok lehian izango duen pelikula The Glass Magazine izango da. 42 minutuko fizkiozko filmak musika esperimentala sortzen duen neska bat du protagonista eta zuzendariak aipatu du "bizitza alternatiboetan sartzeko" balio duela.
Dena den, ez da, berez, pelikula hori Ameriketako Estatu Batuetan ikusiko den lehen aldia. Izan ere, iaz saria jaso zuen herrialde horretan.
Hurrengo lana
Sariak sari eta gonbidapenak gonbidapen, laudioarrak ez du denbora galdu azkenaldian eta jadanik film berri bat prestatu du. Karen Nikgol: Tropic of Cancer da bere izenburua eta Oslon bizi den artista irainiar bati buruzko bi orduko dokumentala da.