Gaur abiatu da Laudioko Jardunaldi Feministen hirugarren edizioa, Zukutu feminismoa lemapean. Udalak eta Laia eskolak antolatuta, hamaika ekintza egongo dira hilaren amaiera bitarte: proiekzioak, tailerrak, antzezlanak, solasaldiak, liburu aurkezpenak... betiere feminismoa ardatz hartuta.
Ainhoa Resano artista bisualaren Ellas proiektuak ireki du bi astetan luzatuko den egitaraua. Azarotik otsailera artean, zazpi emakumez osatutako memoria-talde baten elkargune izan da Lezeaga aretoa.
Resano izan dute gidari, eta elkarren artean berreskuratu dituzte norbere albumak eta bertan gordetako argazki formatuko oroitzapenak. Saio horietan "migrazioaz jatorrizko herriez, Laudioko iragan industrialaz eta landa-eremuaz, grebez, amatasunaz, maitasunaz eta amamen, amen eta alaben arteko harremanaz" mintzatu dira, eta bakoitzaren oroitzapenetatik abiatuta marraztu dute memoria kolektiboa.
🟣💪Laudiok III. Jardunaldi Feministetan murgildu da gaur “Ellas” ekimenarekin
— Laudio (Udala - Ayuntamiento) (@LaudiokoUdala) May 18, 2026
Egitaraua | Programa 👉 https://t.co/TdA77UvyO8 pic.twitter.com/tFbaXrjYmy
Lola, Aureli, Begoña, Marisa, Maribe, Miren eta Toñi. Horiek dira Elexalde kaleko horman kokatutako argazkien protagonistak. Kasuren batean, haiek eurek beharrean, haien amak ageri dira irudietan. Zazpi horiez gain, beste hainbat argazki ere bildu dituzte eta mahai-oihal bat ere ondu du Resanok, Lezeaga aretoan geratuko dena aurrerantzean.
Herritar ugariren arreta bereganatu du gaur eguerdiko aurkezpenak, eta Ellas proiektua jendarteratzeaz gainera, aurtengo Jardunaldi Feministen egitaraua ere zabaltzeko baliatu dute hitzordua Nagore Gomara zinegotziak eta Ainize Gastaka alkateak.
Bihar jarraituko du ekimenak, Zinegoak festibaleko filmen proiekzioarekin, 18:30ean, Lezeaga aretoan. Gainontzeko egunetako egitaraua hemen kontsultatu daiteke.