Laudioko udala gobernatzen duen koalizioak EH Bildu eguna antolatu zuen larunbatean. Goizean hasi zituzten ekintzak, bazkariarekin bukatzeko. Horretarako, herriko plazatik abiatu eta Ermualdera jo zuten goizean goiz. Hamaiketakoaren orduan, aldiz, zinegotziekin eta alkatearekin galderak egiteko eta solasteko aukera eman zuten.
Dena den, egitarauko unerik hunkigarriena eta jende zein interes gehien erakarri zuena Aitor Burgoa zinegotzi ohiaren omenaldia izan zen. Abenduan zendu zen Laudion sustraitu zen ondarrutarra eta EH Bilduko kide anitzek hitz egin zuten berari buruz.
Izan ere, 2019tik 2023ra bitarte zinegotzi izan ez ezik, militante isila eta sakrifikatua izan zen urte luzez. Horrela deskribatu zuten bere burkideek eta azpimarratu zuten maitasunez eta konstantziaz aritu zela koalizioan mundu hobe baten alde.
Kideek nabarmendu zuten lan egiteko prest zegoela beti, baina ez zela titular handien zalea eta maiz erreparatzen ziela besteentzat ikusezinak ziren detaileei, agian batzuentzat txikikeriak direnak, baina ezinbestekoak proiektuek aurrera egin dezaten.
Hitzartze hunkigarrien ondoren, senideei oroigarria eman eta haritza landatzera joan ziren. Izan ere, EH Bilduko militantziak goraipatu zuen Aitor Burgoaren gaitasuna Laudion errotzeko eta fruituak emateko eta zuhaitzarekin gogoratu nahi dute: "Sustraietan sendo, isilean baina tinko, eta familia eusten".
Argazkiak: EH Bildu
