Vibrantz enpresako beharginek elkarretaratzea egin dute gaur lantegiko sarreran atzo gertatutako lan heriotza salatzeko. Jende ugari bertaratu da eta tentsioa eta samina agerikoak izan dira giroan.
Enpresako Langile Batzordeak deitu du kontzentrazioa eta ordezkariek zein hildako laudioarraren lankide batek hitza hartu dute. Lehenik eta behin, elkartasuna adierazi diete zendutako beharginaren lagun eta senideei. Halaber, salatu dute ezin dela normalizatu lanpostutik etxera ez itzultzea.
Halaber, kritikatu dute enpresak murrizketak egin dituela eta erakunde publikoek ez dituztela baliabide nahikoak jartzen lan osasun eta prebentzioan.
Gauzak horrela, ikerketa sakona eta istripuaren ardurak eta erantzukizunak ondo argitzea exijitu dute.
Arratsaldean mobilizazioa
Langileek gogoratu dute gaur arratsaldean (19:30ean) beste mobilizazio bat deitu dutela Aiaraldeko Greba Batzordearekin (SOS Aiaraldea) batera Laudioko Herriko plazan.
Ingeniaritza bat eztandaren jatorria argitzeko
Langile Batzordeak aipatu dio Aiaraldea Komunikabideari Vibrantzek ingeniaritza baten zerbitzua kontratatu duela istripuaren arrazoia ikertzeko. Dirudienez, heriotza gertatu zen pabilioia itxi dute eta dena geratu zen moduan utzi dute adituek aztertu dezaten guztia.
Lantegiko jarduerari dagokionez, gaur ere ez dute lan egingo eta enpresak ez du aparteko presiorik sartu lanera itzultzeko. Ordezkari sindikal batek erantsi du litekeena dela zenbait atal (ekoizpenari lotuta ez daudenak, bereziki) ostiralean berriro martxan jartzea, baina nabarmendu du jende askoren egoera psikologikoa ez dela egokia lanpostura bueltatzeko.
Argazkiak eta bideoa: Ixone Rodriguez