Ehunka lagun batu dira atzo Aretako Vibrantz fabrikan gertatutako lan heriotza salatzeko eginiko mobilizazioan. Isilik zeharkatu dute Laudioko herrigunea. Ondoren, Herriko plazan, minutu bateko isilunea eta beste minutu bateko txalo zaparrada eskaini diote hildako langileari.
Elkarretaratzean azaldu dutenez, gas naturala erretzeko labe batean mantentze-lanak egiten ari zirela gertatu zen istripua, eta nabarmendu dute azpiegitura horrek arazoak zituela aurretik. Horren aurrean, “gertakariak sakon ikertzea eta zer gertatu den argitzea” exijitu dute.
Horrez gain, bitarteko gehiago behar direla aldarrikatu dute, halakorik berriz gerta ez dadin, “ez Vibrantzen, ez Laudion, ez Aiaraldean, ez beste inon”. Gauzak hala, “erantzukizuna eta ahalik eta inplikazio handiena” eskatu diete “enpresari, Osalani eta erakunde eskudun guztiei”.
Salatu dutenez, “enpresen erabakien, prebentzioaren murrizketen eta erakundeen kontrol faltaren emaitza” dira lan heriotzak. “Gehiago ikuskatu behar dute, hobeto kontrolatu eta prebentzioa benetan bete dadin eskatu. Kontrolik eta zaintzarik ez badago, zigorrik ez badago eta baliabide nahikorik ez badago, prebentzioa hitzetan geratzen da”, ohartarazi dute.