Gaur udalbatza mamitsua izan du Laudiok. Izan ere, 1,8 milioi euroko inbertsioak eta hobekuntzarako esku-hartzeei oniritzia eman diete taldeek, baina hezkuntza-zentroetako konponketetarako dirulaguntza proposamena eta fakturen ordainketari lotutako hainbat partida mahaia gainean geratu dira, momentuz.
Oposizioko talde politikoek, kontu hartzailetza txostenetan zenbait akats topatu ostean, horien inguruko eztabaida eta lanketa gehiago egitea eskatu dute. Gogoratu beharra dago EAJk berak arreta deitu zuela atzo tokiko erakundearen zorren inguruan. Udal gobernu taldeak, bere aldetik, oker dauden elementuak ahalik eta lasterren zuzentzea eskatu du, premiaz Udal Osoko Bilkuran berriro lantzeko (ekainaren 29an izango dena).
Udal gobernu taldeak, bere aldetik, oker dauden elementuak ahalik eta lasterren zuzentzea eskatu du, premiaz Udal Osoko Bilkuran berriro lantzeko.
Laudio Antzokia
Onartu den egitasmoetako bat izan da antzokiaren obraren hirugarren moldaketa. Lanak amaitzen ari diren fase honetan, likidazioari aurre egiteko partida hornitu du Udalak eta ordainketa guztiak amaitutzat emango dira.
Kiroldegian aerotermia
Aurrera egin duen beste proposamenetako bat izan da kiroldegiko gas-galdarak aerotermian oinarritutako sistema batez ordezkatzea, estalkian kokatutako instalazio fotovoltaiko baten bidez elikatuta eta gas-galdara bitarteko laguntzaile gisa baliatuta. Horri esker, energia-kontsumoa %22 murriztea aurreikusi dute, eta kiroldegiak behar duen energia %30ean tokiko jatorri berriztagarrien bidez asetzea. Horretarako, Udalak beharrezko finantzaketa eskatuko du.
Padel pista
Gaurko udalbatzan ahalbidetu dute, halaber, padel pistaren kalitatea eta segurtasuna hobetzea. Herritar ugarik erabiltzen dutenez, hondatuta dago azpiegitura.
Horrez gain, Gizarte Kohesio Arlotik bideratzen duten Bizi programaren aurrekontua handitu dute. Udalerri aktibo eta osasuntsua sustatzea du helburu ekimen horrek eta herritarren osasun biopsikosoziala indartzea ere. Horretarako, osasuna, ongizatea eta bizi-kalitatea sustatzen dituzten ekimen komunitarioak garatzen ditu.