Azoka plaza berria funtzionamenduan dago jadanik eta EAJk oharra zabaldu du hori txalotzeko eta gogoratzeko proiektuak aurreko legealdian egin zuela aurrera, hau da, Ander Añibarro alkate zenean. Ordezkari jeltzaleak azaldu duenez, Europako Next Generation funtsetatik 1,8 milioi euro inguru eskuratzeari esker gauzatu ahal izan da jarduera, EAJk merkatuaren birgaitze integralari eta tokiko merkataritzari lotutako beste proiektu batzuei aurre egiteko lortutako finantzaketari esker.
Alderdi jeltzaleak esker oneko hitzak izan ditu orain bere lantokia han duten merkatarientzat: "Bereziki eskertu nahi dugu prozesu honetan erakutsi duten pazientzia, inplikazioa eta konpromisoa. Egoera zail batera egokitzen jakin dute, bezeroekiko lotura eta Laudioko nortasun komertzial eta sozialaren parte den merkatuaren funtsa galdu gabe".
Eremu berriaren ezaugarriak goraipatu ditu opozisioko taldeak: "Bizitzeko, jarduera ekonomikorako eta gizarte-harremanetarako espazioa da. Haren alde egitea saltoki txikien alde egitea da, zero kilometroko produktuaren alde eta herri eredu bizi eta dinamiko baten alde egitea".
Aldiz, Ander Añibarro oso kritikoa izan da udal gobernuan aritutako taldeekin: "Laudiorako inbertsio historiko bat lortu genuen, eta horri esker, eraldaketa horri ekin ahal izan genion, kostu guztia bizilagunen gain jarri gabe. Eta garrantzitsua iruditzen zaigu hori gogoratzea, agintaldi honen hasieran proiektuaren jarraipena arrisku larrian egon zelako, une hartan EH Bilduk eta Omniak osatutako gobernu-taldearen kudeaketa faltagatik eta atzerapenagatik".
Añibarrok azpimarratu du atzerapenen ondorioz dirulaguntza galtzeko arriskuan egon zela.
Gogoratu beharra dago inaugurazioa bihar egingo dutela.