Etxepare Euskal Institutuak eta Zineuskadik ekainean hautatu zituzten Kimuak katalogoan egongo diren zazpi film laburrak eta horietako bat da Aho beltza. Uxue Derecho laudioarra da pelikularen antzezle nagusia eta berarekin Sambou Diaby Okondon bizi den aktorea ere agertzen da.
Hautaketa garrantzitsua da, arestian aipatutako bi erakundeek katalogoko lanak bidaltzen dituztelako munduko film laburren zinema jaialdi garrantzitsuenetara, euskal zinemaren lagin gisa.
Esaterako, eta Uxue Derechok berak Aiaraldea Komunikabideari aurreratu dionez, Donostiako Zinemaldian estreinatuko dute pelikula.
Aho beltza Zumaian grabatu zuten iaz eta Alba Lozanok zuzendu du, Udalbiltzaren Geuretik Sortuak egitasmoaren babesari esker.
Albiste on ugari Uxue Derechorentzat
Antzezleak Aiaraldea Komunikabideari argitu dionez, oso pozik dago Aho beltzak ekarri eta ekarriko dionarekin eta pixkanaka jakingo denarekin, baina, aldi berean, nabarmendu du arraroa dela, filma ez baita oraindik estreinatu.
Dena den, laudioarrak adierazi du proiektua lagungarria izan dela ordezkaria topatzeko (papera bere kabuz lortu baitzuen) eta asko ikasteko.
Etorkizunera begira, Derechok jarraituko du bere burua prestatzen eta hurrengo ikasturtean antzerkian zentratuko da Madrilen, baldin eta ez bada beste filmerik agertzen.