Made in Laudioren edizio berri bat eskainiko dute aurten ere Laudioko Jaietako Berakatz egunean. Ikuskizunak herriaren satira zorrotza bideo laburren bidez eskaintzea du xede. Duela hamabost urte egiten zen ekimena berreskuratu zuen iaz gazte talde batek eta, arrakasta ikusita, errepikatzea erabaki dute.
Honezkero hasi dira grabaketa eta edizio lanekin, eta datorrenaren aurrerapen txikia eskaini zuten ostiralean Ugarteko Jaietan.
Aurtengo “blockbusterra” ez da Christopher Nolanen Odyssey, oraindik ere iristear dagoen Made in Laudio berrituaren bigarren edizioa baizik. Hitzordua galdu nahi ez izatekotan hartu agenda: abuztuaren 26an, 21:30ean, Txosnagunean. Eta espektakulu gogoz geratzen denarentzat Zumba saioa egongo da jarraian.
