Lehen sektoreak bizi duen egoerari erantzuteko estrategia abian du Laudioko Udalak, eta Agroekologiaren aldeko Udalerrien Sareko kide izango da, astelehen honetako osoko bilkuran proposamena aho batez onartu ostean.
Ludi Temiño zinegotziaren arabera, “arazo zehatzak” dira konponbidea behar dutenak, hala nola nekazaritza-jardueraren galera, sektorearen zahartzea, belaunaldien arteko erreleborik eza, lurra eskuratzeko zailtasunak, edo lursailen abandonua.
Horretarako, ekintza zehatzak bilduko dituen programa proposatu dute, eta hainbat ekimen abiatuko dituzte horretarako, besteak beste, “Ellakuriko baratze ekologikoak indartzea, lur-aktiboko banku bat sortzea, Santa Ana baserri-eskola posible gisa berreskuratzea edota udal-lurrak alokatzea”.
Laudioko Udala Agroekologiaren aldeko Udalerrien Sareari atxikitzeari esker, “lehen sektorearen benetako arazoak konpontzeko tresna gehiago” eskuratuko ditu Udalak, Ludi Temiño zinegotziak azaldu duenez.
Hortaz, aho batez onartu dute proposamena talde politiko guztiek. Omniak, dena den, boza eman aurretik argi utzi du bere lehentasuna gertutasuna dela “eta ez agroekologia”. “Hemengo baserritar eta abeltzainek hemen egiten dute lan eta hori bultzatu beharra dago ekologikoa izan ala ez”, adierazi du Jakinda Artaraz bozeramaileak.
Agroekologiaren aldeko Udalerrien Sarea
Agroekologiaren aldeko Udalerrien Sarea Espainiako tokiko erakundeek osatutako elkartea da. Tartean, ingurumena errespetatu, herritar guztientzako eskuragarria izango den janari osasungarria ziurtatu eta tokiko enplegua sustatuko duten dinamikak sortzea du helburu.
Hainbat udalerrik osatzen dute sarea eta Urduña, kasu, zuzendaritza batzordearen parte da. Bertan egin ziren iazko urteroko topaketak, azaroan.