Hamarkada bat baino nabarmen gehiago igaro da Lamuza parkearen aldeko borroka hasi zenetik eta bultzada horren indarrak tokia eraberritu ez ezik, izen eta funtzionamendu berriak ere ekarri ditu tokira. Parkea Kultura Topagunea izango da hemendik aurrera eta bestelako harremanak ezarri nahi dituzte barruan.
Baina hori guztia burutu baino lehen, gaur inaugurazioa egin dute. Jende mordoak parte hartu du horretan eta Ainize Gastaka alkateak egin die harrera herritarrei. Udalburuak animatu ditu laudioarrak, kultura azpiegitura berria erabil dezaten.
Edonola ere, inaugurazioaren elementu bereziena sortu duten giroa bera izan da. Kandelak banatu dituzte, mokadua eskaini dute eta antzezleak aritu dira bertaratutakoekin harremanetan, argiekin jolasten eta parkeak berak historian zehar izan duen bilakaera islatzen, gaurko egunera heldu arte.
Soka laukote batek bete du airea bere soinuarekin eta ezustean, Kultura Etxea izandakoaren argi guztiak piztu dituzte (morez) eta ateak ireki dituzte parez pare, laudioarrek barrutik ezagutu ahal izateko gaurtik aurrera eurentzako kultura birikia izango dena.
Argazkiak: Naia Vallejo Torres