Ander Larrinaga Saiz izango da EAJren Laudioko alkategaia 2027ko maiatzeko udal hauteskundeetan. Hala erabaki du herriko batzar jeltzaleak, "alkatetza berreskuratzeko eta udalerriari etapa berri bat irekitzeko" asmoarekin.
Larrinagak esperientzia oparoa du politika instituzionalean. Laudioko Udal Gobernuko zinegotzi eta alkateorde izan zen 2019tik 2023ra, eta "hiri-garapenarekin, antolaketa publikoarekin eta zerbitzu orokorrekin lotutako erantzukizunak" hartu zituen, bere alderdikideek nabarmendu dutenez.
Legealdi honetan Udalean jarraitu du EAJren ordezkari gisa, eta hiru urte daramatza Arabako Foru Aldundiko Ekonomiaren Garapen eta Berrikuntzako zuzendari arduretan.
Lan-esparruan, aldiz, sektore publikoaren eta pribatuaren arloko estrategia eta eragiketen aholkularitzan aritu izan da, eta horretara bideratuta egon dira egin dituen ikasketak ere, Enpresen Administrazio eta Zuzendaritzan lizentziatu zen Deustuko Unibertsitatean, eta masterra egin zuen ESIC Business School-en Marketin eta Merkataritza Kudeaketako Zuzendaritzan.
Alkategaiak azaldu du "harrotasun, ilusio eta erantzukizun handiarekin" hartzen duela ardura. "Ohore bat da nire lankideen konfiantza izatea pauso hau emateko eta Laudioko Alkatetza berreskuratzeko. Apaltasunez eta lan egiteko gogo handiz hartzen dut erronka hau, nire esperientzia eta energia gure herriaren zerbitzura jartzeko", azaldu du politikariak.
Alkate moduan izango lituzkeen helburu nagusiak ere aipatu ditu Larrinagak: "Laudioarren bizi-kalitatea hobetzea eta Laudio garbiagoa, zainduagoa, modernoagoa, seguruagoa eta etorkizunera begira ilusioz betea eraikitzea".
Helburuak
Alkate moduan izango lituzkeen helburu nagusiak ere aipatu ditu Larrinagak: "Laudioarren bizi-kalitatea hobetzea eta Laudio garbiagoa, zainduagoa, modernoagoa, seguruagoa eta etorkizunera begira ilusioz betea eraikitzea".
Bide horretan, "proiektu zintzo bat" gidatu nahi duela aldarrikatu du, "Laudio berriro erreferente izan dadin eta gure herritarren benetako beharrei erantzuteko".
Horri lotuta, "industria berreskuratzearen eta gazteentzako bizi-aukerak sortzearen" garrantzia ere nabarmendu du hautagai jeltzaleak: "Laudiok kultura, kirola eta bizitza kalean gainezka egitea nahi dut. Gure kultura- eta aisialdi-elkarteekin, gure kirol-klubekin, merkatariekin, ostalariekin eta familia guztiekin batera egin behar dugu".
"Entzuteko eta eraikitzeko prozesua"
Bere proiektua "hurbiltasunetik eta entzutetik" garatuko duela adierazi du Larrinagak: "Asko dugu hobetzeko, baina harro egoteko asko ere badugu. Laudio erreferente bat da industriagatik, auzoengatik, gizarte-konpromisoagatik eta udal-bizitzan sartzen den elkarte-sare sendoagatik. Potentzial hori guztia aprobetxatu behar dugu eta Udala motorra izatea lortu behar dugu, eta ez galga bat".
Horretarako, "Laudioko auzo eta sektoreen proposamenak eta beharrak" jasotzeari ekingo diote jeltzaleek datozen hilabeteetan.