Jose Mari Ibarbiaren omenaldiarekin abiatu dituzte Laudioko mikologia jardunaldiak. Izan ere, Ibarbia herriko mikologia elkarteko kide oso garrantzitsua izan zen eta urte luzez, gainera.
Izan ere, laudioarra mikologo erreferentziala izan zen eta, atzo oroitu zuten moduan, Roberto Lotina mikologo famatuaren lagun handia izan zen.
Hori gogoratzeko 12:00etan batu ziten atzo Kasinoan. Cristobal Burgosek osatutako proiekzioarekin eta Laudio Mikologia Elkarteko kideen hitzartzeekin ezaugarritu zuten ekitaldia. Ibarbiaren senideak eta lagunak elkartu ziren eguerdian eta familiak oroigarria ere jaso zuen.
Ekintza hunkigarri horrekin hasi dituzte aurtengo jardunaldiak eta bihar jarraituko dute 19:00etan Zeru Txiki txokoan La Posada jatetxeko sukaldariaren erakustaldiarekin.
Ostegunean dastatze saioa egingo dute ordu eta toki berean eta larunbat goizean ziza eta onddo sailkapena eskainiko dute elkartearen behin-behineko gelan.
Azkenik, igandean aleak ikusteko, marrazki lehiaketan parte hartzeko, pintxoak dastatzeko eta Ibai Garciaren fosil erakusketa ezagutzeko beta emango dute, 10:00etatik aurrera Herriko plazan.
Argazkiak: Txomin Egiluz Sagastizabal