Aurreko urteetan egin bezala, eskualdeko ikastetxe publikoek Hezkuntza Praktika Hobetzeko Prestakuntza Proiektuaren inguruan batu dituzte indarrak eta goiz osoko trebakuntza saioa eskainiko dute azaroaren 7an, larunbatean.
9:30ean hasiko da jarduera Laudioko Kasinoan eta 13:30ean amaituko dute. Hizlaria Jose Antonio Fernandez Bravo matematiken irakaskuntzan aditua izango da. 120 entzule hartuko ditu ekimenak, gehienez.
Berez, Fernandez Bravok ospe handia dauka irakasleen artean pedagogia berritzailea proposatzen duelako. Izan ere, ikasleek erantzun beharreko galderetan oinarritu ordez, ikasleek eurek itaunak egitea sustatzen du.
Eredu horrekin honako helburu hauek bilatzen ditu:
- Ikasleekin elkarrizketa aberasgarriagoak sustatzea.
- Jakin-mina eta ikasteko gogoa piztea.
- Ikasgelan eta etxean egiten diren galderen kalitatea hobetzea.
- Pentsamendu-prozesuei laguntzea, erantzun guztiak berehala eman gabe.
- Ikasleen autonomia handiagoa sustatzea.
- Ikaskuntza-egoera parte-hartzaileagoak eta esanguratsuagoak sortzea.
Hezitzaileen kalitatea hobetzea xede
Ikastetxe publikoek antolatzen dituzten saio hauen bitartez eskualdeko hezkuntzaren kalitatea hobetzea eta ikasle guztien garapen integrala sustatzea dute helburu. Hainbat edizio antolatu dituzte jadanik eta besteak beste, psikologoak ekarri dituzte jardunaldietara, ongizate emozionala ere erdigunean jarrita.
Hala eta guztiz ere, ekitaldia irekia da, ez baita beharrezkoa irakaslea izatea parte hartzeko. Ikasleak eta senideak ere bertaratu daitezke. Hori bai, aurretik izena eman behar dute hemen.